གཏམ་ཉན་པར་མཁས་པའི་མི་ནི་མཁས་པ་ཡིན། མཁན་པོ་བསོད་བར་རྒྱས་ཀྱིས་མཛད།
ལེའུ་བརྒྱད་པ།
ལྟ་ཚུལ་གྱིས་འཇིག་རྟེན་དུ་འཚོ་ཚུལ་ལ་འགྱུར་བ་གཏོང་ནུས།
ཆེས་རིན་ཐང་ལྡན་པའི་མི་ནི་ཁ་བདེ་ལྕེ་མཁས་ཅན་ཞིག་ཡིན་པའི་ངེས་པ་མེད་པས་གཏམ་ལ་ཉན་མཁས་པ་ནི་ད་གདོད་མཁས་པའི་ཁྱད་ཆོས་ཡིན།
སྔོན་འདས་པའི་དུས་ཤིག་ན་རྒྱལ་ཁབ་གཞན་གྱི་ཕོ་ཉ་རྒྱ་ནག་ཏུ་སྐྱེས་རྫོང་དུ་སླེབས་པ་དང་གསེར་ལས་བྱས་པའི་མིའི་གཟུགས་བརྙན་མི་ཚད་ལོང་པ་གསུམ་ཕུལ་བས་གོང་མའི་ཡིད་སེམས་དབང་མེད་དུ་འཕྲོག དེའི་ཚེ་ཕོ་ཉ་དེས་གསེར་གྱིས་བྱས་པའི་གཟུགས་བརྙན་མི་ཚད་ལོང་པ་འདི་གསུམ་ལས་ཆེས་རིན་ཐང་གཞལ་དུ་མེད་པ་དེ་གང་ཡིན་ཞེས་དྲིས།
གོང་མས་རྒྱལ་ཁབ་ཡོངས་ཀྱི་བཟོ་བ་ཆེས་ཕུལ་དུ་བྱུང་བ་བསྡུས་ནས་བཟོ་ལུགས་ལ་དཔྱོད་པ་དང་ལྗིད་ཚད་འཇལ་བ་སོགས་ཐབས་མང་པོས་བརྟགས་པས་དབྱེ་དཔྱོད་གང་ཡང་བྱེད་མ་ཐུབ། གོང་མ་ཐུགས་ངལ་ཆེན་པོར་གྱུར་ཏེ་རྒྱལ་ཁབ་ཆེན་པོ་ཞིག་གིས་ཐ་ན་དྲི་བ་འདི་ཙམ་ལ་ལན་མ་ཐེབས་ན་ངོ་ཚ་ཁ་སྐྱེངས་དགོས་པར་འགྱུར་རོ་སྙམ་དུ་བསམས།
དེ་ཙ་ན་ལོ་ན་མཐོན་པོ་ལོན་པའི་བློན་ཆེན་ཞིག་གིས་ཁོ་ལ་ཐབས་ཡོད་སྨྲས་པས་གོང་མས་མྱུར་དུ་ཤོད་ཅེས་བསྒོས། བློན་ཆེན་དེས་བག་ཕེབ་པོས་རྩྭ་འཇག་མ་གསུམ་བླངས་ནས་གསེར་གྱི་གཟུགས་བརྙན་གྱི་རྣ་བ་རུ་དྲངས།
གཟུགས་བརྙན་དང་པོ་ལ་དྲངས་པའི་འཇག་མ་དེ་རྣ་གཡོན་པ་ལས་འཛུལ་ནས་རྣ་གཡས་པ་ལས་ཕྱུང་།
གཟུགས་བརྙན་གཉིས་པ་ལ་དྲངས་པའི་འཇག་མ་དེ་རྣ་བ་ལས་འཛུལ་ནས་ཁའི་བུ་ག་ལས་ཐད་ཀར་ཐོན།
གཟུགས་བརྙན་གསུམ་པ་ལ་དྲངས་པའི་འཇག་མ་དེ་རྣ་བ་ལས་འཛུལ་ནས་ལྟོ་བར་ལྷུང་ཞིང་གྲགས་འགུལ་ཅི་ཡང་མ་བྱུང་།
དེ་ནས་བློན་ཆེན་དེས་སྐད་གསང་མཐོན་པོས་གཟུགས་བརྙན་གསུམ་པ་དེའི་རིན་ཐང་ཤིན་ཏུ་ཆེ་ཞེས་སྨྲས་པ་དང་ཕོ་ཉ་བས་མོས་མཐུན་བྱས་ཏེ་མགོ་ལྕོག་ལྡེམ།
གཏམ་རྒྱུད་འདིས་རང་རེ་ལ་ཅི་ཞིག་གདམས་ཡོད་ཅེ་ན། དེ་ཡང་ཆེས་རིན་ཐང་ལྡན་པའི་མི་ནི་ཁ་བདེ་ལྕེ་མཁས་ཅན་ཞིག་ཡིན་པའི་ངེས་པ་མེད་པས་གཏམ་ལ་ཉན་མཁས་པ་ནི་ད་གདོད་མཁས་པའི་ཁྱད་གཤིས་ཡིན་ཞེས་གདམས་སོ། །
ཡིན་ཡང་ང་ཚོས་དུས་དང་རྣམ་པ་ཀུན་ཏུའམ་བྱ་བ་གང་ཞིག་དང་འཕྲད་ཀྱང་ཚིག་གཅིག་ཀྱང་མི་བཤད་པར་ཁུ་སིམ་མེར་སྡོད་པའི་ཧ་ཅང་ཐལ་དྲགས་པའི་མཐའ་རུ་ལྷུང་མི་ཉན།
བཤད་འོས་པ་ཐམས་ཅད་ངེས་པར་བཤད་དགོས་པས་དེ་ལྟ་ན་བྱ་བ་ཡང་ད་གདོད་ལེགས་པར་འགྲུབ་ནུས། བཤད་མི་འོས་པ་དག་ལ་སྣང་ཆུང་བྱས་ཏེ་ཅི་འདོད་ཀྱིས་བཤད་ན་ཏག་ཏག་རྐྱེན་ངན་སྣ་ཚོགས་རླུང་གིས་བསྐྱོད་པའི་རྒྱ་མཚོའི་རླབས་ལྟར་གཅིག་རྗེས་གཉིས་མཐུད་ཀྱིས་ལྡང་སྲིད་པས་རང་གར་བཤད་མི་རུང་།